CEBU, Philippines - Nalandig sa tambalanan ang usa ka drayber sa taxi human pusila sa ilang silingan duol sa San Roque Chapel sa sitio Callejon, barangay Labangon, dakbayan sa Sugbo sa miaging hapon.
Ang biktima giila sa kapolisan nga si Reynante Titio, 32, nagpuyo sa maong dapit ug usa ka drayber sa taxi.
Samtang ang suspetsado giila usab nga si Mark Labuan alyas Ingking, 31, walay trabaho, nga silingan sa biktima.
Sumala sa kapolisan nga sayo niini nagduwa og baraha ang biktima ug ang suspek dihang nagkalalis sila.
Dihang miinit ang lalis milakaw ang suspek ug mikuha sa iyang armas de fuego sa ilang balay.
Sa pagbalik niini kalit nga giluthang ang biktima ug naigo sa walang bahin sa iyang liog.
Gidala dayon sa mga silingan ang biktima ngadto sa Cebu City Medical Center, samtang padayon pang gipangita sa kapolisan ang suspetsado.( /WC) (BANAT NEWS)
No comments:
Post a Comment
"Post a comments"